El Regato Ikastetxeko Batxilergoko 1. mailako ikasleek aukera paregabea izan dute beren prestakuntza aberasteko, Erasmus+ programaren barruan Alemaniako Schleswig-Holstein eskualdeko enpresetan bi asteko lan-praktikak eginez.
Esperientzia hau apirilean abiatu zen eta trukearen bigarren zatia izan da. Orduan, Bizkaiko enpresetan praktikak egiteko Alemaniatik etorritako 13 ikasle hartu genituen gure ikastetxean. Oraingoan, berriz, gure ikasleen txanda izan da. Guztira, Batxilergoko 1. mailako hamaika ikaslek parte hartu dute nazioarteko mugikortasun-programa honetan, etorkizunerako balio handiko esperientzia profesional eta pertsonala biziz.
Bi astez, ikasleek Schleswig-Holsteingo hainbat herritan egin dituzte praktikak, besteak beste Sankt Peter-Ording, Lübeck eta Mölln udalerrietan. Bertan, benetako lan-ingurune batean aritu dira, atzerriko hizkuntza batean komunikatuz, lan egiteko modu berrietara egokituz eta eguneroko erronka profesionalei aurre eginez.
Ikasle bakoitzak bere interes eta profilaren araberako esperientzia izan du. Iraia Marcelok, esaterako, Sankt Peter-Ordingeko diseinu eta publizitate agentzia batean egin zituen praktikak, italiar jatetxe bateko Food Truck baten errotulazio osoaren diseinuan parte hartuz. Egonaldia amaitu aurretik, gainera, bere diseinua amaituta eta ibilgailuan jarrita ikusteko aukera izan zuen.
Bestalde, Sara Lópezek Kulpingo lorezaintza-enpresa batean egin zituen praktikak. Bertan, bezeroei eskaintzeko landare eta sasoiko loreak prestatzen eta zaintzen jardun zuen. Gainerako ikasleek ere askotariko erakunde eta enpresetan egin zituzten praktikak: hortz-klinika batean, ingeniaritza-enpresa batean, zinema batean, udal batean eta beste hainbat lan-esparrutan.
Lan-esperientziaz gain, egonaldiak alderdi pertsonal eta kulturala ere izan du. Ikasleek, Alemaniako trukeko ikaskideekin batera, Hamburg hiria bisitatu zuten; bertan, Elba ibaian itsasontziz ibili eta hiriko Rathaus edo udaletxe ezaguna ezagutzeko aukera izan zuten. Lübeck hiria eta bere Holsten ate ospetsua ere bisitatu zituzten, Alemaniako ondare historiko eta kulturala gertutik ezagutuz.
Erasmus+ programak finantzatutako proiektu honek amaiera bikaina eman dio El Regato Ikastetxeak Erasmus Akreditazioa lortu zuenetik garatutako lehen ikasturteari. Akreditazio horri esker, gure ikastetxeak nazioarteko mugikortasun-proiektuetan parte hartzen jarraitu ahal izango du datozen urteetan.
El Regato Ikastetxean uste dugu ikastea ez dela ikasgelara mugatzen. Ikastea mundua ezagutzea ere bada, erronka berriei aurre egitea, beste kultura batzuk bizitzea eta etorkizunerako beharrezkoak izango diren gaitasunak garatzea. Horrelako esperientziek gure hezkuntza-proiektua aberasten dute eta gure ikasleak pertsona eta profesional gisa hazten laguntzen dute.
